先利申一下，筆者對Honda X-ADV確實存在住一定嘅偏愛。全因極度欣賞佢外表粗獷之餘，又保留咗大羊(Maxi Scooter)嗰種無可替代嘅方便實用性。再加埋Honda強大嘅品牌效應同原創精神，真係好難令人抗拒。

只可惜礙於銀紙有限，未能即時磅水入手新車之餘，更甚嘅係X-ADV喺二手市場一直有價有市，企得非常硬，唔係話想買就買到合心水嘅盤。最近，Honda為最新版本嘅X-ADV增添咗一個Special Edition(SE)特別版，性能規格上雖然維持一貫嘅高水準未有大改動，但用上咗全新嘅車身配色。筆者睇完真係覺得佢係歷來最靚嘅一款，究竟幾時先有能力將呢輛完美之作駕駛返屋企呢？唉……

一手創出ADV潮流：完美融合越野與日常通勤
講起ADV(Adventure Vehicle)車種，簡單嚟講就係將歷奇電單車(Adventure Bike)嘅越野精神，同大型綿羊嘅日常便利性進行完美融合嘅混合體。傳統歷奇電單車越野能力雖然強橫，但喺城市通勤塞車時就顯得笨重麻煩。相反，綿羊仔方便易騎又有充足儲物空間，但一駛入泥地就即刻投降。X-ADV嘅出現就係為咗解決呢個死結。

佢擁有高達165mm嘅高離地距、長行程避震、粗獷嘅輪胎設定，以及17吋前輪配15吋後輪嘅SUV式霸氣外觀。再配合埋DCT雙離合自動波箱、巨型座下儲物箱同舒適坐姿，讓騎仕由市區塞車一路殺到山路泥徑都可以得心應手。佢已經超越咗一般交通工具嘅範疇，成為名副其實嘅「兩輪SUV」，令每日嘅通勤變成充滿探索樂趣嘅歷奇之旅。

回顧歷史，Honda絕對係呢個ADV潮流嘅真正開創者。早於2015年嘅意大利米蘭EICMA車展上，Honda已經極具前瞻性地展出咗「City Adventure」概念車，及至2016年正式揭曉原型車，並喺2017年投入量產上市。當時根本冇人諗過一輛自動波羊可以做到咁狂野，但Honda巧妙地運用NC 750平台嘅鋼管菱形車架，配上745c.c.雙汽缸引擎同DCT波箱，打造出全球第一款真正嘅歷奇型綿羊。

呢個破天荒嘅概念一推出即刻爆紅，歐洲銷量直線攀升，至今已賣出近60,000輛，穩佔Honda歐洲第二暢銷電單車款嘅寶座。Honda憑藉多年Africa Twin參與拉力賽嘅豐富經驗，將純正越野DNA注入都市車款，向世人證明「歷奇原來可以好方便」，徹底顛覆咗整個電單車市場嘅玩法。

26YM HONDA X-ADV

不斷進化與完善：由新概念蛻變成熟王者
X-ADV自2017年誕生以來從未停步，首代車型標準配備DCT波箱、鋼線輪框、41mm倒立前叉同Pro-Link後避震，已經展現出強勁嘅低中扭力同越野姿態。2018年廠方為其加入HSTC扭力控制系統同多種騎乘模式，提升安全性。而2021年更加係X-ADV嘅重大轉折點，Honda大幅提升引擎輸出、減輕車重、銳化外觀線條，並加入TFT全彩儀錶板、LED頭燈同可調風擋，令實用性同科技感大躍進。

去到最新嘅2025-2026年型號，廠方進一步微調DCT波箱，徹底消除低速起步同爬行時嘅頓挫感，令整個加速感受極致自然。同時新增咗Cruise Control巡航定速、5吋全彩TFT顯示屏、RoadSync手機藍牙連接導航，以及Smart Key無匙系統。實用性方面，風擋可以手動調高139mm，座椅加厚咗10%提升舒適度，座位底儲物空間更增至22L，足夠放入一個Full face頭盔，並齊備USB-C充電口。呢啲年復年累積落嚟嘅改進，令X-ADV保持住市場領先地位。

最新SE版本獨特之處：致敬傳奇拉力賽車
廠方早前釋出2026年X-ADV嘅各種車身色，當中最搶眼絕對係X-ADV Special Edition(SE)版！標準版固然吸引，但SE版換上咗「Pearl Glare White Tricolor」三色塗裝，以純白為主底色，配上極具標誌性嘅鮮明紅藍圖案，直接向Honda傳奇嘅Africa Twin 拉力賽車致敬！

呢個特別配色充滿住拉力賽同HRC賽車DNA，配搭更銳利嘅SUV式車身線條，以及黑色隱藏式「Hidden Eye」雙LED投射頭燈(連日行燈同方向燈)，外觀即刻由都市探索者升級成準備征服一切嘅歷奇猛獸。而SE版較標準版高出嘅車價，主要就係買呢套獨家塗裝嘅霸氣。此外，廠方亦提供Adventure Pack 配件(如前霧燈、車側護架等)供選配，進一步突出Off-road形象。值得一提嘅係，現時X-ADV嘅車身部分組件採用咗Durabio生物基聚碳酸酯物料製造，更加環保耐用。

充沛動力與豐富電控：全天候嘅駕駛享受
動力核心方面，X-ADV SE採用745c.c.水冷四衝程平行雙汽缸SOHC引擎，壓縮比為10.7:1，可輸出最大馬力58.8ps/6,750rpm及最大扭力7.03kg-m/4,750rpm。低、中段扭力極具爆發力，城市起步輕鬆，高速巡航同樣夠力，最高時速可達168km/h。而且油耗僅為3.6L/100km，配合13.2L油缸，一缸油理應可以跑超過350km，真正做到好力又慳油。

制動及懸掛系統同樣頂級，前41mm SFF-CA倒立叉擁有153.5mm行程，後Pro-Link單筒彈簧避震則有150mm行程，加上前296mm雙浮動鑽孔碟配四活塞卡鉗，無論駛過坑洞定係煞車都俾到騎仕十足嘅信心。

最後，電子系統亦係X-ADV SE嘅一大賣點。核心嘅Throttle by Wire電子油門配合4種預設騎乘模式(Standard、Sport、Rain、Gravel)加上1個User自訂模式，每種模式都會獨立調校油門反應、DCT換檔時機同HSTC扭力控制級別。配合ABS系統，提供全天候嘅安全保護。呢套電子系統唔單止提升實用性，更令駕駛變得智能又個人化。

總結
2026 Honda X-ADV SE絕對係廠方彰顯歷奇精神嘅巔峰之作，無論你係都市上班族定長途旅行者，呢輛「兩輪SUV」都絕對值得你努力儲錢入手！

2026 Honda X-ADV SE規格表
全長：2,215mm
全闊：940mm
全高：1,370mm
軸距：1,590mm
座位高度：820mm
最低離地距：165mm
濕重：237kg
油箱容量：13.2L
引擎型式：水冷四衝程並列兩汽缸SOHC 8氣門
缸徑x衝程：77.0 x 80.0mm
容積：745c.c.
壓縮比：10.7:1
最大馬力：58.6ps/6,750rpm
最大扭力︰7.04kg-m/4,750rpm
供油系統︰36mm PGM-FI電子燃油噴注
點火：電子
起動：電動
驅動模式：鍊條
離合器/波箱：DTC雙離合器,濕式多片6前速
迴轉半徑︰2.8m
拖曳距︰105mm
前傾角︰27度
耗油量︰3.6L/100km
碳排放量︰85g/km
極速︰168km/h
車架︰鑽石形鋼管
前懸掛系統：41mm SEF-CA倒立套筒前避震,行程153.5mm
後懸掛系統︰Pro-Link多連桿中置式單筒油壓彈簧,行程150mm
前制動系統：296mm雙浮動鑽孔碟配徑向四活塞卡鉗,ABS
後制動系統︰240mm單鑽孔碟配單活塞卡鉗,ABS
前輪胎：120/70-R17 M/C(58H)
後輪胎︰160/60-R15 M/C(67H)