撰文：何七
图片提供：文伟电自行车中心

小孩子才会做选择！Triumph Street Triple 765，一个中量级嘅街霸型号，不论性能、造型都绝对能满足一众车迷。不过，厂方深知车迷面对再好嘅设计都会想更上一层楼，于是就诞生咗Street Triple 765 RX同埋Street Triple Moto2 Edition。一款只限今年发售，另一款则全球限量1,000辆。两款车各有特色，若果唔系户口余额带嚟限制，我都好想讲句：我全都要！

RX之名
能配上RX名字嘅，都系Triumph家族入面专注于运动化骑乘嘅型号。第一辆RX版喺2015年登场，当时嘅Street Triple RX已经畀人一种进取及敏锐嘅感觉，系基本版以外嘅升级首选。佢𠮶种极具动感嘅个性，加上独特嘅线条造型，令RX旋即受到车迷追捧，同时亦奠定咗RX作为“赛道就绪”嘅标志。

来到2026年，继Speed Triple 1200 RX之后，RX之名再一次回到Street Triple身上。最新版嘅RX可说系Street Triple嘅赛道专注版，将比赛技术、流线造型以及高阶部件融汇于一身，展现出Triumph不论喺日常街道定系赛道上，皆已臻至成熟嘅造车工艺。

Triumph与Moto2
自2019年起，Triumph成为咗Moto2嘅单一品牌引擎供应商，一直为Moto2车队提供专为比赛调校嘅三缸引擎，喺呢项严苛嘅世界最高殿堂赛事中，展现咗极佳嘅性能表现。喺呢段期间，Triumph亦达成咗令人惊讶嘅里程碑，例如极速达到300km/h、76项赛事圈速纪录、89项圈速历史纪录，以及喺赛事环境中跑咗超过170万公里！

Triumph嘅765c.c.引擎喺Moto2赛事中被推向极致，喺如此极端嘅环境下证实咗佢嘅耐用性。呢啲宝贵嘅赛道数据，让Triumph嘅工程师可以进一步将引擎推向顶峰，将赛道嘅语言完美套用喺Street Triple嘅开发之中。

三缸顶级动力
Street Triple 765 RX同Moto2版共用咗与RS版相同嘅心脏，一台喺12,000rpm能爆发出130ps最大马力，以及喺9,500rpm提供8.16kg-m最大扭力嘅机器。工程师嘅目标系将原本已经表现出色嘅RS，进一步调校成更有赛道个性嘅版本。设计重点在于以轻巧嘅车架，配以全调校式Ohlins NIX30倒立前叉，仲有全调校式嘅Ohlins STX40尾避震，为每一个弯角提供极致嘅路面回馈与操控。呢套赛道级配置确保骑仕能有稳定且反应敏锐嘅体验，不论喺赛道攻向弯心，定系喺蜿蜒山路上都能够得心应手。

除咗旗舰级悬挂，车身尽是受赛事启发嘅零部件，专门为使操控更精良及为骑仕带来更大信心而设。分离式把手带嚟更进取、更前倾嘅坐姿，即系更适合赛道驾驶嘅姿势。另一方面，车头一双Brembo Stylema四活塞卡钳配以Brembo MCS可调式手泵，手泵提供咗拉杆距离及压力比嘅调校，确保制动精确且全面受控。轮下配上Pirelli Diablo Supercorsa SP V3轮胎，抓地力及牵引力绝对无庸置疑。全车湿重只有188kg，令Street Triple操控更为灵活。

两个新型号都配上5吋TFT显示屏幕，以及高阶按键配置。Moto2版嘅启动画面完美展现佢嘅赛车血统，上眼镜更可以揾到1,000辆限量版嘅独立编号。电子系统方面，例如有ABS Track模式、最佳化弯道ABS以及循迹控制系统，全部都系为提升稳定性而设，让骑仕喺压弯时有更好表现。加上Triumph Shift Assist无缝上下转档无需拉离合器，骑仕嘅发挥自然更得心应手。

车身风格
Street Triple RX采用咗进取嘅设计风格，令车身处处展现出速度感。哑面铝银底色，配上极为抢眼嘅魔鬼红车尾副架及轮框，将源自赛车嘅设计灵感推向极致。除咗油缸两侧，座鞍上都可以揾到RX字样。另外上眼镜同尾鼓亦有RX标志，就算远距离都绝对唔会认错。

Moto2版则将赛车基因推向另一层次，用上矿物灰同水晶白作为主色，再以Triumph Performance Yellow(黄色)于车尾副架及轮框色条作点缀，带嚟截然不同嘅运动化风格。车身多处印有Moto2品牌标志，例如油缸、座鞍及尾喉，TFT仪表嘅起始画面亦有专属动画，进一步确立佢同Moto2嘅连系。车身两侧嘅饰片、肚兜及头灯上嘅饰片全部用上碳纤维制作，加上上眼镜嘅限量独立编号，令Moto2版成为Street Triple家族中最独特、最尊贵嘅一员。

总结：车霸进化，两款皆是终极之选！
不管是专为赛道而生、限量1,000辆且满载碳纤维部件嘅Moto2 Edition，还是将竞技基因与道路实用性完美结合嘅Street Triple 765 RX，Triumph这次都交出咗一份令车迷热血沸腾嘅答卷。两款新车同样继承咗Moto2淬炼出嘅强悍三缸心脏与旗舰级悬挂配备，更展现出截然不同嘅英伦狂野美学。正如开篇所讲，面对呢两辆无可挑剔嘅中量级街霸，如果唔系户口余额限制，又有边个车迷能抗拒“我全都要”嘅诱惑呢？

2026 Triumph Street Triple 765 RX(Moto2)规格表
全长：2,051mm
全阔：765mm
全高：1,051mm(不连睹后镜)
轴距：1,397mm
座位高度：839mm
最低离地距：-mm
湿重：188kg
油箱容量：15L
引擎型式：水冷四冲程直列三汽缸DOHC 12阀门
缸径x冲程：78.0mm x 53.4mm
容积：765c.c.
压缩比：13.25:1
最大马力：130ps/12,000rpm
最大扭力︰8.16kg-m/9,500rpm
供油系统︰电子燃油喷注
点火：电子
起动：电动
离合器/波箱：湿式多片滑动及辅助式，6前速
前倾角：23度
拖曳距：95.3mm
耗油量︰5.2L/100km
碳排放︰119g/km
车架︰铝合金双翼梁车架，两件式高压压铸车尾副架
前悬挂系统：Ohlins NIX30 41mm倒立前叉，附压缩、回弹及预载调校，行程115mm
后悬挂系统︰Ohlins STX40带樽单筒弹簧附压缩、回弹及预载调校，行程131.2mm
前制动系统：310mm双浮动钻孔碟配Brembo Stylema单体放射式四活式卡钳，Cornering ABS
后制动系统︰220mm单钻孔碟，配Brembo单活塞卡钳，Cornering ABS
前轮框：3.50″ x 17″铝合金五柱式轮框
后轮框：5.50″ x 17″铝合金五柱式轮框
前轮胎︰120/70 ZR 17
后轮胎︰180/55 ZR 17