Ducati推出的全新2026 Panigale V4 R，無疑是一輛將頂尖賽道科技直接帶到現實的工程結晶。除了超過230ps的強悍馬力與進階的空氣動力學設計，今代車型最值得留意的機械變革，絕對是廠方首度由廠隊下放的DRG賽車波箱與DNL空波鎖。

這套系統將空波位置移至1波之下，徹底改變了傳統電單車的操作邏輯，純粹為了在極限重迫力收車拖波時，杜絕任何誤入空波的風險。接下來，筆者將深入為大家拆解這部為突破圈速而生、純粹且硬派的WSBK認證猛獸。

源自賽道嘅極致超跑
去年9月，Ducati正式發佈咗針對WorldSBK賽事打造嘅全新頂級超跑Panigale V4 R，並以限量生產形式發售。首款Panigale V4喺2018年正式推出，取代咗Ducati標誌性嘅V2雙汽缸引擎，成為新世代跑車嘅代表作。舊款搭載1,103c.c.引擎嘅Panigale V4及V4 S定位偏向街道同一般Track Day使用，並非WSBK賽事規格。而2026款嘅Panigale V4 R就係純正嘅賽事結晶，排氣量精準設定喺998c.c.，完全符合WorldSBK嘅賽車規範。

外觀與空力套件
新款Panigale V4 R嘅外觀造型喺標準版基礎上，進行咗激進嘅空氣動力學延伸。大膽採用更誇張嘅定風翼設計，面積比V4 S增大咗20mm。這套系統喺時速270km/h嗰陣可以額外產生4.8kg嘅下壓力，而喺300km/h嘅高速之下，更可額外提供6kg嘅下壓力，大幅提升車身喺極端高速下嘅穩定性。

此外，兩邊下包圍增添咗名為Corner Sidepods彎道側導流罩嘅擾流套件，設計靈感來自2021款MotoGP賽車Desmosedici GP，可以令架車喺高速大傾角過彎嗰陣獲得更優異嘅車胎咬地力。全車線條經過重新設計，由深邃嘅車頭到俐落嘅車尾，凸顯出簡潔而且極致戰鬥嘅設計語言，配備鋁合金拉絲工藝嘅17L油缸，全車標配LED燈具。

電控系統
Panigale V4 R配備咗目前最全面同專業嘅電控系統，包含六軸IMU、循跡控制DTC DVO、車身狀態監測DVO、滑動控制DSC、Bosch彎道ABS、防起頭控制DWC DVO、自動車胎校準、Engine Brake控制EBC DVO、賽道迫力控制以及道路版eCBS，仲標配埋電子快排DQS 2.0。車輛提供Race A、Race B、Sport、Road及Wet五種騎乘模式，每種模式都會即時調整動力輸出同電控參數。車手可以按自己習慣進行深度自定義，亦可以隨時還原原廠設定。

如果想喺賽道上火力全開，搭配賽道專用嘅Akrapovic鈦合金排氣喉同專屬賽道ECU調校，可以徹底釋放V4 R嘅動力潛能。啟動後，系統設定會直接同廠隊賽車睇齊，引擎反應更加純粹。錶板升級為全新6.9吋TFT全彩螢幕，比例為8:3，解像度達1280 x 480。寬闊嘅螢幕比例帶嚟更完整嘅視覺體驗，黑底介面亦確保咗極佳嘅日間辨識度。

DVO與賽道級迫力控制
EBC Engine Brake控制升級咗DVO監測功能。簡單嚟講，DVO可以喺極限重迫力嗰陣，依據估算嘅尾輪接地壓力自動調節Engine Brake強度，精準計出尾輪承受得起嘅最大迫力扭力。一旦尾輪打滑逼近極限，系統會微調節氣門開度，重新平衡扭力，瞬間攞返咬地力，令高速入彎嘅車身姿態穩如泰山。

迫力系統方面，ABS具備街道同賽道雙重邏輯。專為賽道開發嘅Race Brake Control系統計算更加精準，容許車手喺車身大傾角時施加更大嘅迫力道。呢樣意味住騎仕可以將煞車點推得更遲，好似MotoGP車手咁喺尾輪幾乎鎖死嘅極限邊緣進行重迫力減速。

引擎與動力
動力核心係一副水冷四衝程90度V型四汽缸DOHC、每缸4氣門引擎，總排氣量998c.c.，缸徑與行程維持81.0mm x 48.4mm。呢副Desmosedici Stradale R機器經過大幅強化，歐版最大馬力喺15,750rpm可以爆發218ps，美版為208.4ps。如果換埋Akrapovic鈦合金賽道排氣喉，最大馬力增至235ps；若果進一步用埋Ducati Corse專用嘅高性能偈油，最大馬力會壓榨至驚人嘅238.5ps。

原廠極速達318.4km/h，賽道化改裝後更可突破極限，達到330.6km/h。引擎內部升級包括全新設計嘅進氣系統同排氣凸輪軸、減重5.1%嘅輕量化活塞、高慣性曲軸，以及重新定位嘅節氣門噴油嘴。優化後令動力輸出更加線性飽滿，油門反應得心應手，完美沿用咗Ducati廠隊嘅冠軍調校邏輯。

DRG賽車波箱與DNL空波鎖
DRG賽車波箱同DNL空波鎖，絕對係呢輛2026 Ducati Panigale V4 R作為合法出牌賽車最純粹嘅證明。呢套系統完全顛覆咗平時駕駛一般電單車嘅習慣，佢嘅存在只係為咗解決一個核心問題：喺賽道極限狀態下，杜絕任何轉波失誤嘅可能。

一般市售電單車嘅波段排列，都係由1波、空波順序上到最高嘅6波，空波收埋喺一波同二波之間(1-N-2-3-4-5-6)雖然平時已經習慣使用，但落到賽道就變成致命隱患。當車手喺大直路尾以接近時速300公里準備重迫力收車入彎嗰陣，必須要快速連續拖波。如果由2波拖落1波嗰下踩得唔夠應，波箱就好容易卡喺中間入咗個空波。喺極限過彎時，車身極度依賴Engine Brake嚟維持穩定同減速，萬一意外跣入空波，Engine Brake就會瞬間消失，喺賽道上通常意味住嚴重炒車或者衝出跑道。

為咗解決呢個痛點，Ducati將MotoGP及WSBK廠車嘅波箱佈局直接移植落V4 R身上，造就咗呢副DRG賽車波箱。它最大嘅特點係將空波移咗去1波底，波段排列變成由最底嘅空波向上順序遞增去到六波(N-1-2-3-4-5-6)。呢種設計帶嚟咗決定性嘅賽道優勢，確保咗絕對安全嘅拖波機制。

車手重迫力入彎、瘋狂連續落波嗰陣，只要死命向下踩到盡加上(DNL空波鎖)，最低波段就一定係1波，絕對唔會意外踩入空波，確保車手入彎前一定攞到最大且穩定嘅Engine Brake。其次，因為1波同2波之間再無空波阻住，內部齒輪咬合行程變短，意味住起步後由1波踢上2波嘅過程更加無縫、快速同順滑，動力銜接直接好多。

不過，既然空波移咗去1波底，又衍生出另一個新問題：車手會唔會喺極限拖波嗰陣，唔小心由1波再向下踩錯入空波？為咗防止呢種情況發生，Ducati工程師開發咗DNL空波鎖。呢套係結合咗物理同電子嘅保險機制，平時會將空波鎖死，令波箱最低波段停喺1波。落場駕駛嗰陣，DNL處於鎖定狀態，無論車手點踩，波棍踩到1波就落唔到去，確保架車維持喺戰鬥狀態。

只有當騎仕需要入空波，例如返Pit區或者泊車嗰陣，先至必須要做一個雙重確認動作。車手要用右手手指公㩒住右邊手把上面嘅DNL專屬解鎖撥桿，喺㩒住嘅同時，左腳再向下踩波棍，呢個時候波箱先至會容許齒輪咬合入空波。呢套系統徹底犧牲咗平時市區行下停下嘅便利性，換嚟嘅卻係喺分秒必爭嘅賽道上，嗰份無可取代嘅精準度同安全性。

車架與懸吊迫力
車架部分，全新鋁合金雙翼樑Front Frame車架嘅橫向剛度降低咗40%，有效提升咗最大傾角時嘅路感回饋同高速入彎嘅穩定性。尾搖臂就棄用傳統嘅單搖臂，改用剛性更佳嘅可調式鋁合金中空對稱雙搖臂，搭配輕量化鋁合金鍛造輪框及Pirelli Diablo Supercorsa SP高性能車胎。

避震系統毫不妥協，前方配置全可調43mm Ohlins NPX 25/30倒立前叉，後方為全可調Ohlins TTX36氣樽式單筒避震，並首次為V4 R標配咗Ohlins SD20轉向阻尼器。迫力系統由一對Brembo Hypure對向四活塞輻射式卡鉗搭配330mm鑽孔碟負責前輪減速，尾輪就用單活塞卡鉗配245mm鑽孔碟。

總結
最新一代嘅Panigale V4 R唔單止係WSBK官方認證嘅量產賽車，更加係MotoGP技術嘅直接下放。由DRG波箱、DNL空波鎖到激進嘅空氣動力學，一切設定都係為咗突破圈速而生。超過230ps嘅狂暴馬力同極度硬核嘅配置，註定佢唔適合日常行街代步。賽道，先至係呢輛性能猛獸唯一應該去嘅地方。

2026 Ducati Panigale V4 R規格表
全長：-mm
全闊：-mm
全高：-mm
軸距：1,477mm
座位高度：855mm
最低離地距：-mm
乾重：186.5kg
油箱容量：17L
引擎型式：水冷四衝程Desmosedici Stradale 90度V4汽缸DOHC 16氣門
缸徑x衝程：81.0 x 48.4mm
容積：998c.c.
壓縮比：14.0:1
最大馬力：218ps/15,750rpm
最大扭力︰11.67kg-m/12,000rpm
供油系統︰電子燃油噴注(符合歐+5規例)
點火：電子
起動：電動
驅動模式：鍊條
前傾角︰24度
拖曳距︰98mm
耗油量︰7.2L/100km
碳排放量︰167g/km
離合器/波箱：乾式多片6前速
波箱比︰(1)2.400 (2)2.000 (3)1.736 (4)1.523 (5)1.363 (6)1.227
車架︰編織式鋼管車架
前懸掛系統︰Ohlins NPX 43mm倒立式電子避震,行程125mm
後懸掛系統︰Ohlins TTX36單筒油壓彈簧,電子避震,行程130mm
前制動系統：330mm浮動鑽孔碟配Brembo Monobloc Hypure 4活塞卡鉗
後制動系統︰245m單鑽孔碟配兩活塞卡鉗
前輪框︰五爪鍛造輪框3.50″x17″
後輪框︰五爪鍛造輪框6.00″x17″
前輪胎：Pirelli Diablo Supercorsa SP-V4 120/70 ZR17
後輪胎︰Pirelli Diablo Supercorsa SP-V4 200/60 ZR17