先利申一下，笔者对Honda X-ADV确实存在住一定嘅偏爱。全因极度欣赏佢外表粗犷之余，又保留咗大羊(Maxi Scooter)𠮶种无可替代嘅方便实用性。再加埋Honda强大嘅品牌效应同原创精神，真系好难令人抗拒。

只可惜碍于银纸有限，未能即时磅水入手新车之余，更甚嘅系X-ADV喺二手市场一直有价有市，企得非常硬，唔系话想买就买到合心水嘅盘。最近，Honda为最新版本嘅X-ADV增添咗一个Special Edition(SE)特别版，性能规格上虽然维持一贯嘅高水准未有大改动，但用上咗全新嘅车身配色。笔者睇完真系觉得佢系历来最靓嘅一款，究竟几时先有能力将呢辆完美之作驾驶返屋企呢？唉……

一手创出ADV潮流：完美融合越野与日常通勤
讲起ADV(Adventure Vehicle)车种，简单嚟讲就系将历奇电自行车(Adventure Bike)嘅越野精神，同大型绵羊嘅日常便利性进行完美融合嘅混合体。传统历奇电自行车越野能力虽然强横，但喺城市通勤塞车时就显得笨重麻烦。相反，绵羊仔方便易骑又有充足储物空间，但一驶入泥地就即刻投降。X-ADV嘅出现就系为咗解决呢个死结。

佢拥有高达165mm嘅高离地距、长行程避震、粗犷嘅轮胎设定，以及17吋前轮配15吋后轮嘅SUV式霸气外观。再配合埋DCT双离合自动波箱、巨型座下储物箱同舒适坐姿，让骑仕由市区塞车一路杀到山路泥径都可以得心应手。佢已经超越咗一般交通工具嘅范畴，成为名副其实嘅“两轮SUV”，令每日嘅通勤变成充满探索乐趣嘅历奇之旅。

回顾历史，Honda绝对系呢个ADV潮流嘅真正开创者。早于2015年嘅意大利米兰EICMA车展上，Honda已经极具前瞻性地展出咗“City Adventure”概念车，及至2016年正式揭晓原型车，并喺2017年投入量产上市。当时根本冇人谂过一辆自动波羊可以做到咁狂野，但Honda巧妙地运用NC 750平台嘅钢管菱形车架，配上745c.c.双汽缸引擎同DCT波箱，打造出全球第一款真正嘅历奇型绵羊。

呢个破天荒嘅概念一推出即刻爆红，欧洲销量直线攀升，至今已卖出近60,000辆，稳占Honda欧洲第二畅销电自行车款嘅宝座。Honda凭借多年Africa Twin参与拉力赛嘅丰富经验，将纯正越野DNA注入都市车款，向世人证明“历奇原来可以好方便”，彻底颠覆咗整个电自行车市场嘅玩法。

26YM HONDA X-ADV

不断进化与完善：由新概念蜕变成熟王者
X-ADV自2017年诞生以来从未停步，首代车型标准配备DCT波箱、钢线轮框、41mm倒立前叉同Pro-Link后避震，已经展现出强劲嘅低中扭力同越野姿态。2018年厂方为其加入HSTC扭力控制系统同多种骑乘模式，提升安全性。而2021年更加系X-ADV嘅重大转折点，Honda大幅提升引擎输出、减轻车重、锐化外观线条，并加入TFT全彩仪表板、LED头灯同可调风挡，令实用性同科技感大跃进。

去到最新嘅2025-2026年型号，厂方进一步微调DCT波箱，彻底消除低速起步同爬行时嘅顿挫感，令整个加速感受极致自然。同时新增咗Cruise Control巡航定速、5吋全彩TFT显示屏、RoadSync手机蓝牙连接导航，以及Smart Key无匙系统。实用性方面，风挡可以手动调高139mm，座椅加厚咗10%提升舒适度，座位底储物空间更增至22L，足够放入一个Full face头盔，并齐备USB-C充电口。呢啲年复年累积落嚟嘅改进，令X-ADV保持住市场领先地位。

最新SE版本独特之处：致敬传奇拉力赛车
厂方早前释出2026年X-ADV嘅各种车身色，当中最抢眼绝对系X-ADV Special Edition(SE)版！标准版固然吸引，但SE版换上咗“Pearl Glare White Tricolor”三色涂装，以纯白为主底色，配上极具标志性嘅鲜明红蓝图案，直接向Honda传奇嘅Africa Twin 拉力赛车致敬！

呢个特别配色充满住拉力赛同HRC赛车DNA，配搭更锐利嘅SUV式车身线条，以及黑色隐藏式“Hidden Eye”双LED投射头灯(连日行灯同方向灯)，外观即刻由都市探索者升级成准备征服一切嘅历奇猛兽。而SE版较标准版高出嘅车价，主要就系买呢套独家涂装嘅霸气。此外，厂方亦提供Adventure Pack 配件(如前雾灯、车侧护架等)供选配，进一步突出Off-road形象。值得一提嘅系，现时X-ADV嘅车身部分组件采用咗Durabio生物基聚碳酸酯物料制造，更加环保耐用。

充沛动力与丰富电控：全天候嘅驾驶享受
动力核心方面，X-ADV SE采用745c.c.水冷四冲程平行双汽缸SOHC引擎，压缩比为10.7:1，可输出最大马力58.8ps/6,750rpm及最大扭力7.03kg-m/4,750rpm。低、中段扭力极具爆发力，城市起步轻松，高速巡航同样够力，最高时速可达168km/h。而且油耗仅为3.6L/100km，配合13.2L油缸，一缸油理应可以跑超过350km，真正做到好力又悭油。

制动及悬挂系统同样顶级，前41mm SFF-CA倒立叉拥有153.5mm行程，后Pro-Link单筒弹簧避震则有150mm行程，加上前296mm双浮动钻孔碟配四活塞卡钳，无论驶过坑洞定系煞车都俾到骑仕十足嘅信心。

最后，电子系统亦系X-ADV SE嘅一大卖点。核心嘅Throttle by Wire电子油门配合4种默认骑乘模式(Standard、Sport、Rain、Gravel)加上1个User自订模式，每种模式都会独立调校油门反应、DCT换档时机同HSTC扭力控制级别。配合ABS系统，提供全天候嘅安全保护。呢套电子系统唔单止提升实用性，更令驾驶变得智能又个人化。

总结
2026 Honda X-ADV SE绝对系厂方彰显历奇精神嘅巅峰之作，无论你系都市上班族定长途旅行者，呢辆“两轮SUV”都绝对值得你努力储钱入手！

2026 Honda X-ADV SE规格表
全长：2,215mm
全阔：940mm
全高：1,370mm
轴距：1,590mm
座位高度：820mm
最低离地距：165mm
湿重：237kg
油箱容量：13.2L
引擎型式：水冷四冲程并列两汽缸SOHC 8气门
缸径x冲程：77.0 x 80.0mm
容积：745c.c.
压缩比：10.7:1
最大马力：58.6ps/6,750rpm
最大扭力︰7.04kg-m/4,750rpm
供油系统︰36mm PGM-FI电子燃油喷注
点火：电子
起动：电动
驱动模式：链条
离合器/波箱：DTC双离合器,湿式多片6前速
回转半径︰2.8m
拖曳距︰105mm
前倾角︰27度
耗油量︰3.6L/100km
碳排放量︰85g/km
极速︰168km/h
车架︰钻石形钢管
前悬挂系统：41mm SEF-CA倒立套筒前避震,行程153.5mm
后悬挂系统︰Pro-Link多连杆中置式单筒油压弹簧,行程150mm
前制动系统：296mm双浮动钻孔碟配径向四活塞卡钳,ABS
后制动系统︰240mm单钻孔碟配单活塞卡钳,ABS
前轮胎：120/70-R17 M/C(58H)
后轮胎︰160/60-R15 M/C(67H)